Liderraren aurkako neurketan lana gogotik egin, eta hiru puntuak eskurtu zituen gizonezkoen Gorengo Mailako taldeak. Hamahiru jardunaldi igarota, sailkapeneko buru-buruan dira azpeitiarrak. Neurketa orekatua eta gogorra izan zen. Bigarren zatian, baina, Lagunek ate aurrean asmatzea lortu zuen. Lehen gola Aritz Azkuek egin zuen. Eskuin hegaletik ateratako falta bat buruz bikain errematatu, eta baloiak sareetan bukatu zuen. Bigarren eta azken gola, berriz, Xuban Peñak egin zuen faltaz. Bi eta hutsekoarekin emaitzari eusteko egin zuen borroka taldeak. Hiru puntuak Garmendipen gelditu ziren, beraz. Horri esker, taldea berriro lider da 28 punturekin, Aloña Mendik baino puntu bat gehiagorekin hain zuzen. Datorren asteburuan partida berezia jokatuko du taldeak herritarren aurka; Ikasberriren aurka, alegia. Datozen egunetan zehaztuko da ordutegia.