Lagun Onak F.T.

Oinatzen azken partidoa

Eskerrik asko atzo Garmendipera gerturatu zineten guztioi! Hona hemen Oinatz Elustondoren etxeko azkenengo partiduak utzitako argazki pare bat:

UZTARRIAK egindako elkarrizketa

Oinatz Elustondo: "Futbola pasio bat izan da niretzat"

OIÑATZ

Lagun Onaken gizonen talde nagusiak Espainiako Hirugarren Mailako ligaren azkenaurreko partida jokatuko du gaur (18:00) Garmendipen, San Ignacioren kontra. Taldeko kapitainak, Oinatz Elustondok (Azpeitia, 1990), bere azken partida izango du etxean. 32 urte bete berri ditu, eta denboraldiaren amaierarekin batera esango dio agur futboleko ibilbideari, kirol horrek eman dionarekin beteta eta etxekoen babesa eskertuta.

Zenbat urte egin dituzu Lagun Onaken?

Eskola kirolean Ikasberrin jokatu ondoren, infantiletako lehen urtean, 12 urterekin, Lagun Onaken hasi nintzen. Urtebete eginda, Realak fitxatu ninduen. 19 urtera arte jokatu nuen Realean. Sansera iritsi nintzen, baina partida bakarra jokatu nuen, jubeniletan nengoela igo ninduten batean. Sanseko lehen urtean Lagun Onaken jokatu nuen urtebetez, Realak utzita. Hura amaituta, Realean esan zidaten ez zutela nirekin kontatzen, eta Portugaleten jokatu nuen beste urtebetez, han ere Hirugarren Mailan. Portugaleten denboraldia osatuta itzuli nintzen Lagun Onakera, eta 11 urte jarraian egin ditut hemen. Beraz, guztira hamabi urte egin ditut Lagun Onaken talde nagusian.

Eta Lagun Onaken kapitain, zenbat denbora?

Bi urte, iazkoa eta aurtengoa. [Hodei] Tena erretiratu zenean hartu nuen kapitaintza; kapitainordea nintzen, eta hark futbola utzi zuenean, niri eman zidaten ardura.